ILOILO CITY – Gin-athag ni Iloilo City Mayor Jerry Treñas nga wala sang kaangatanan sa plano sini sa 2025 elections ang pagbag-o sini sang iya pagtamod sa mga kasumpong sini sa politika.
Ini ang kasunod man sang pagpakigkita sang iya mga anak nga sanday Iloilo City Councilor Miguel Treñas kag Raisa Treñas-Chu kay former Iloilo City Mayor Joe Espinosa III.
Nahibaluan nga nga asawa ni Espinosa nga si Gina Sarabia Espinosa kag ang asawa ni Treñas nga si First Lady Rosalie Sarabia Treñas ang mag-utod.
Kahapon, kadungan sang inagurasyon sang mega dam nga Jalaur River Multi-Purpose Project sa Calinog, Iloilo, nagkamustahanay kag nag-beso pa ang alkalde kag si Iloilo City Lone District Rep. Julienne ‘Jamjam’ Baronda.
Una na nga gindeklarar sang alkalde nga may yara na sang political break-up sa tunga nila ni Baronda.
Sa interview sang Bombo Radyo kay Treñas, iya ginpahayag nga si anay Mayor Espinosa ang malapit sa iya mga kabataan.
Samtang ang pag-upod naman sini kahapon kay Baronda ang bangud man sa paghagad sang iya mga kaangay nga politiko nga mag-updanay sila sa picture bilang mga dinapit nga bisita sa kahiwatan.
Sa amo nga event, personal man nga nagtambong si President Ferdinand Marcos Jr.
