Ginpunto sang isa ka disaster expert, nga ang bagyo kag baha amo ang pinaka-delikado kag seryoso nga hazard nga ginatubang sang probinsya kag syudad sang Iloilo subong.
Sa interview sang Bombo Radyo Iloilo kay Dr. Jerry Bionat, former Provincial Disaster Risk Reduction and Management Office (PDRRMO) Head, ginpahayag sini nga bisan wala sang bagyo nga nagasulod sa Pilipinas, posible gihapon ang mabaskog nga ulan kag pagbaha bangud sang Southwest Moonsoon ukon Habagat nga kabahin sang moonsoon season halin Hunyo tubtob Oktubre.
Gindugang pa niya nga ang mga bagyo nagaporma sa Pacific Ocean malapit sa Caroline Islands, kag ini naga-evolve halin sa tropical depression tubtob sa super typhoon.
Ginsaysay man ni Dr. Bionat nga ginapabaskug sang climate change ang epekto sang panahon, kag ang pagbaha nagaluntad bangud sang pagdamo sang mga tawo, pagkalbo sang mga kagulangan, poor drainage system, pag-ubra sang mga subdivision, kag pagpabaya sang mga basura.
Ginpahanumdom niya ang publiko nga maghalong kag magpabilin nga alerto sa mga advisory kag laygay sang mga otoridad, bangud bisan wala sang bagyo, posible gihapon ang pagbaha kag peligro nga dala sang climate change.
