ILOILO CITY – Gindala na lamang sa langas-langas ni Iloilo City Mayor Jerry Trenas ang problema sa baha sa idalom nga bahin sang Ungka flyover.
Sa interview sang Bombo Radyo kay Mayor Jerry Treñas, iya ginpahayag nga ang pagbaha sa idalom nga bahin sang Ungka flyover, bentaha ini para sa tawo nga indi makasarang magbayad agud nga makapaligo sa swimming pool.
Suno pa sa alkalde, ang pagbaha sa lugar ang lakip man sa istoryahan sang Regional Development Council- Infrastructure Development Committee sa Mayo 15.
Matandaan nga sang nagligad nga semana, kadungan sang pagbubo sang mabaskog sang ulan, nagtuga sang hu-ol sa publiko ang madalom nga pagbaha sa idalom nga bahin sang Ungka flyover.
