ILOILO CITY – Wala pa sang tinimuk-timok sa Sangguniang Panlalawigan sa probinsya sang Iloilo may kaangtanan sa committee chairmanship para sa 14th Sangguniang Panlalawigan.
Sa intreview sang Bombo Radyo kay fourth district board member Rolando Distura nga amo man ang senior board member, iya ginpahayag nga wala pa siya sang may nabatian nga nagpabutyag sang interes sa mga komitiba.
Sa masunod nga Sanggunian, duha gid lamang ang bag-o nga mga board members.
Ini amo sanday 1st district board member-elect Atty. Carmelo Nochete kag 5th district board member-elect Binky Tupas.
Bangud sini, wala sang dako nga epekto sa committee chairmanship ang pagsulod sang mga bag-o nga mga board members.
Bilang tradisyon, ang senior board member ang magaserbe bilang majority floor leader.
Apang subong nga termino, gin-ayo ni 4th district board member Domingo Oso kay Distura nga siya ang magapungko bilang majority floor leader.
Sa bahin ni Distura, bilang committee chairman sang Infrastructure kag Disaster Risk Reduction and Management, wala sang problema sa iya kun amo sa gihapon nga komitiba ang iya kaptan.
Suno sa iya, may yara pa siya sang ordinansa nga gusto nga tapuson sa masunod nga termino.
Apang, kun ihatag sa iya ang posisyon nga majority floor leader, wala man sang problema para sa iya.
