ILOILO CITY – Wala nag-agi sa husto nga proseso ang pagbakal sang Department of Health sang kontrobersiyal nga Dengvaxia vaccines.
Ini ang ginpahayag ni anay Health Secretary Paulyn Ubial sa interview sang Bombo Radyo Iloilo.
Suno kay Ubial, nakibot na lang sila nga ginbakal na ang anti-dengue vaccines kag gin-implementar na ang vaccination program.
Ginpahayag sang anay tiglikom nga gindali-dali ang pagbakal sang Dengvaxia vaccines.
Paathag ni Ubial, santu sa kalakaran sang DoH, dapat nga mag-agi sa Executive Committee ang tagsa ka desisyon nga himuon sang ahensiya.
Ang Executive Committee ang ginabug-usan sang tiglikom, mga assistant secretaries kag undersecretaries.
Apang wala mag-agi sa Executive Committee ang pagbakal sang Dengvaxia kag wala pa matalakay, nabakal na ang bakuna.
Pero ginpahayag ni Ubial nga wala siya sang ideya kun sin-o ang nagrekomenda kag nagdesisyon agud baklon ang Dengvaxia vaccines.