ILOILO – Ginaduso sang Department of Health (DOH) Western Visayas ang pagdumili sa pagbaligya sang sigarilyo sang “per stick” ukon binilog.
Ini nga tikang ang ginhimo agud mabuhinan ang premature mortality ukon ang kamatayon sa edad nga 30-70 anyos bangud sang mga sakit nga ginadulot sang pagpanigarilyo.
Sa interview sang Bombo Radyo kay John Richard Lapascua, Senior Health Program Officer sang DOH6, iya ginpahayag nga ini nga tikang sang DOH ang kabahin man sang pagsunod sa Graphic Health Warning Laws, sa diin dapat butangan sang mga health warnings ang mga cigarette packs.
Suno kay Lapascua, nakabutang sa health warnings sa putos sang sigarilyo ang mga sakit nga posible makuha sa pagpanigarilyo kaangay sang lung cancer, asthma, kag madamo pa.
Iya ginpahayag nga kon pasugtan ang pagbaligya sang per stick ukon binilog, indi makit-an sang mga bumalakal ang health warnings nga posible pa kuntani nga makapahanumdom sa ila sang health risks sang amo nga buluhaton.
Kaangot diri, ginahingyo man sang DOH6 ang mga Local Government Unit (LGU) sang kada banwa nga mag-obra sang ordinansa nga nagaduso sa pagdumili sang pagbaligya sang sigarilyo sang binilog bilang suporta sa ila pamunuan.
