ILOILO CITY–Nabakante na ang tanan nga komitiba sa Sangguniang Panlalawigan sa probinsiya sang Iloilo.
Ini kasunod sang pagpabor sang mayorya sang Sangguniang Panlalawigan sa ginduso ni Iloilo 3rd District Board Member Emmanuel “Manny” Gallar nga ibakante ang tanan nga komitiba sa session.
Ginpahayag ni Gallar nga katuyuan sang iya ginhimo amo nga ma re-organize ang tanan nga committee chairmanship sa Sangguniang Panlalawigan.
Sa 13 ka mga myembro sang Sangguniang Panlalawigan, siyam ang nagpabor sa ginduso ni Gallar.
Ini ang ginalakipan nanday 1st District Board Members Rene Valencia kag Marcelo Valentin Serag, 3rd District Board Member Manny Gallar, 4th District Board Members Bryant Paul Biron kag Domingo Oso Jr., 5th District Board Members Nielo Tupas kag Jeneda Salcedo- Orendain, Liga ng mga barangay president Dorothy Paez kag provincial SK federation President Bianca Requinto.
Ang wala nagpabor amo sanday 2nd District Board Members Demetrio Sonza kag Liecel Mondejar-Seville kag si PCL president Licurgo Tirador.
Wala naman nakaboto si Board member Lorenz Defensor bangud nga siya ang nagserbi nga presiding officer tal-os kay Vice Governor Christine Garin nga on-leave.
Samtang, inpaathag Gallar ang iya nangin basehan sa pagduso nga ibakante ang tanan nga komitiba sa Sangguniang Panlalawigan nga gin-paboran man sang mayorya.
Sa interview sang Bombo Radyo kay Gallar, ginpahayag niya nga nasaad sa internal rules and procedures sang Sangguniang Panlalawigan ang pagpatigayon sang re-organization kun ginkasugtan sang mayorya.
Suno kay Gallar, normal lang ini sa bisan diin nga legislative body kag ini na ang ikaduha nga pagpatigayon sang re-organization sang mga komitiba sa Sangguniang Panlalawigan.
Gindugang pa sang natungdan nga katuyuan sini nga hatagan sang kahigayunan ang tanan nga board members nga mauyatan man ang iban nga komitiba kag agud mahatagan man sang committee chairmanship sanday ex-officio members Liga ng mga Barangay President Dorothy Paez kag provincial SK federation president Bianca Requinto.