Pagbaligya kag pagparenta sang balay, naaktuhan sang Iloilo City Government sa Barangay San Pedro, Molo , I.C.

Molo, Iloilo City – Ginpadal-an na sang “notices to vacate” ang mga occupants sa Barangay San Pedro, Molo, Iloilo City.

Ini matapos natukiban nga iligal nga ginabaligya sang isa ka empleyado sang Iloilo City Hall kag barangay official ang rights sa lote sang Iloilo City Government sa amo nga barangay.

Sa interview sang Bombo Radyo kay Barangay Kagawad Rhomar Martirez, chairman sang housing and infrastructure committee sa amo nga barangay, iya ginpahayag nga ginpatigayon sang Office of the Building Officials, Iloilo City Urban Poor Affairs Office kag Taskforce Anti Squatting and Illegal Structures ang pagpahalin sang mga occupants.

Suno kay Martirez, sa tion nga mabaton na sang mga occupants ang notice, mahimo na ini nga makahalin sa lugar.

Samtang, pagahatagan sang extension nga tatlo pa ka adlaw ang nabilin nga mga occupants antes i-demolish ang mga panimalay.

Sa karon, ginaimbestigaran na sang City Legal, City Administator, kag Office of the Building Officials ang rason kun sin-o ang yara sa likod sang pagbaligya sang rights kag mga pamalay sa lote mismo sang Iloilo City Government.