ILOILO CITY – Ipatuman na umpisa sa Lunes, Hunyo 8, ang panibag-o nga extension sa pagbakal sang makahulubog nga ilimnon sa syudad sang Iloilo.
Ini matapos nga nagpaguwa sang Executive Order 086-A si Iloilo City Mayor Jerry Treñas agud amyendaran ang probisyon sang nauna Executive Order tuhoy sa oras sang pagbakal sang tanan nga sahi sang Liquor and Alcoholic Drinks.
Sa interview sang Bombo Radyo kay Treñas, iya ginpahayag nga sa baylo nga 5:00 sang hapon, himuon na nga kutub 8:00 sa gab-i ang pagbakal sang makahulubog nga ilimnon.
Humalin 8:00 sa gab-i tubtub kaagahon, dumili-an na ang pagbakal sang tanan nga Liquor products.
Suno kay Treñas, luyag niya nga hatagan sang ligwa ang tanan apang kun tani, indi lang magtuga sang kinagamo bangud nga indi magduha-duha ang compliance officers nga magpangdakop sang violators.
Samtang, gin-athag man sang alkalde nga ginadumili-an sa gihapon ang pagpatigayon sang bulang apisar nga yara na sa Modified General Community Quarantine ang syudad sang Iloilo.
Ang nasambit nga pagsulundan suno sa natungdan ang santo sa guidelines sang National Inter-Agency Task Force kasunod sang insidente sa Davao kun sa diin may nagluntad nga local transmission sang virus kadungan sang ginpatigayon nga bulang.
