ILOILO CITY- Nagapati si Senate Minority Leader Franklin Drilon nga ang pagbaligya sa mga duta nga ginatindugan sang military, police headquarters kag national penitentiary ang solusyon agud indi na mangutang ang Pilipinas sa pagtapna sa Coronavirus disease 2019 (COVID-19) pandemic.
Sa exclusive interview sang Bombo Radyo Iloilo kay Drilon, iya ginpahayag nga ang Camp Aguinaldo nga headquarters sang Armed Forces of the Philippines kag Camp Crame nga amo ang central office sang Philippine National Police nga makit-an sa Quezon City ang mahimo nga ibaligya bangud nahamtang ini sa syudad nga may mataas nga revenue generation sa pungsod.
Mangin ang New Bilibid Prison sa Muntinlupa suno sa senador ang pinakamahal nga penetentiary sa bilog nga kalibutan kun ang square meter sang duta ang istoryahan.
Ang matipon nga kwarta suno kay Drilon ang mahimo nga magamit sa pagbulig sa mga nagapamierde nga negosyo kag dugang ng social amelioration fund sa mga nadulaan sang trabaho.
Ginhimo pa nga palaanggiran ni Drilon ang Old Airport sa Mandurriao,Iloilo City nga isa na ka business center kag ang daan nga Iloilo Rehabilitation Center sa kilid sang Iloilo Provincial Capitol nga nangin isa na ka museum.
