ILOILO – Wala pa sang petsa kun san-o magabalik ang commercial flights sa Iloilo.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga mahimo nga sa masunod nga semana, may yara na sang desisyon ang Civil Aviation Authority kag ang mga airline companies kun san-o gid magabalik ang operasyon sang paluparan.
Suno kay Defensor, sa subong, sweeper flights ukon chartered flights para sa Locally Stranded Individuals ukon repatriated Overseas Filipino Workers lang ang mahimo nga makasakay.
May kaangtanan diri, ginpahayag ni Defensor nga wala gid sang problema sa Iloilo Provincial Government apang nagakadapat nga may yara lang sang limit sa tagsa ka semana kag may yara sang abiso antes ang flight agud nga mahandaan ang repatriation.
Lauman suno kay Defensor nga magapaguwa siya sang Executive Order tuhoy sa nangin agenda sang pagsinapol kaupod ang mga tiglawas sang Civil Aviation Authority kag ang mga airline companies.
Para naman sa mga Locally Stranded Individuals kag repatriated Overseas Filipino Workers nga yara sa Cebu, ginpahayag sang gobernador nga wala anay sang byahe sang barko bangud nga madamo ang COVID-19 case sa nasambut nga lugar.
Kun tuhoy naman sa mga pagguwa sa Western Visayas, wala sang problema bangud nga may yara sang ginahatag nga travel pass para sa mga magabalik sa trabaho.
Ang nagakadapat lang nga problemahan suno sa natungdan amo ang receiving Local Government Unit kun bala nagabaton sila sang returning residents ukon returning workers.
