ILOILO CITY – Indi pa masigurado kun san-o gid magabukas ang talatapan sang Bureau of Fire Protection Region 6 apisar nga nagnegatibo na sa COVID-19 ang 103 sa 196 nga naka-angkon sang close contact sa Patient no. 144.
Sa interview sang Bombo Radyo kay Fire Senior Inspector Stephen Jardeleza, tagpamaba sang Bureau of Fire Protection Region 6, iya ginpahayag nga nalakip sa 103 ka personnel nga nagnegatibo sa COVID-19 amo si anay Regional Director Fire Senior Supt. Roderick Agiuto.
Magluwas kay Aguto, nalakip man diri ang apat sa lima ka mga pulis nga nag-transaksyon sa Iloilo City Fire Station apang ginahulat pa ang resulta sang RT-PCR test sang isa ka pulis.
Sang nakaligad nga adlaw, may 29 na nga nagnegatibo kag sa subong, ginahulat pa ang 64 ka COVID-19 test results agud makumpleto ang 196 ka mga naka-angkon sang close contact.
May kaangtanan naman sa pagbalik sang operasyon sang ahensya, nakadepende na pa ini sa mahisugtan kag sa rekomendasyon sang COVID-19 team.
Nahibalu-an nga ginpasirado ang talatapan sang Bureau of Fire Protection Region 6 umpisa sang Hunyo 16 matapos nga nagpositibo sa COVID-19 ang isa ka personnel.
