Dapat umpisahan sa balay ang pagtudlo sa mga bata nga magbasa agud madala nila ini tubtob nga sila ang magtigulang.
Sa interview sang Bombo Radyo kay Dr. Jose Patubo, Municipal Culture, Arts, History and Tourism Officer sang banwa sang San Enrique kag isa man ka reading advocate, iya ginpahayag nga ini ang dapat tungdan sang mga ginikanan ilabi na subong nga may pandemya kag wala sang face-to-face classes.
Ini nga punto ang ginalauman man nga mahangpan ilabi na subong nga Nobyembre nga amo ang National Reading Month.
Suno kay Patubo, kritikal ang ihibalo sa pagbasa bangud diri nagaumpisa ang ihibalo sa pagpahayag, paghangop, kag pagpakig-angot sa iban.
Ang pagbasa suno kay Patubo ang pwede man mahimo nga bonding sang mga kabataan kag sang ila ginikanan kag paagi man agud maexpress ang kaugalingon.
Magluwas nga ini ang makapasangkad sang kaalam sang tawo, isa man ini ka sahi sang intimacy.
Panugyan ni Patubo sa mga ginikanan, dapat gid magtalana sang tion kada adlaw para sa pagbasa sang mga kabataan.
