ILOILO CITY – Ang pagtib-ong sang pagbasa sang kabataan ang mayor nga katuyu-an sang Iloilo Storytellers.
Sa interview sang Bombo Radyo kay Loren Opong, manunudlo kag founder sang nasambit nga grupo, iya ginpahayag nga gintukod ang Iloilo Storytellers sang 2009 sa bulig man sang iya mga abyan kag kakilala.
Una nila nga proyekto amo ang paghatag sang feeding program sa kabataan paagi sa donasyon.
Sa amat-amat suno kay Opong, nagdamu naman ang mga organisasyon nga nagbulig sa Iloilo Storytellers.
Bilang isa sa mga storyteller, ginpahayag ni Opong nga isa sa mga pagpanghangkat amo nga kun paano makuha ang atensyon sang kabataan agud nga magpamati sa kaundan sang istorya.
Ginpahayag ni Opong nga ang kabudlay ang wala niya ini ginahatagan sang igtalopangod bangud nga nagapangibabaw ang iya pag-ulikid nga makabulig sa iya isig ka tawo.
Katuyu-an sang pagpangabudlay sang Iloilo Storytellers amo nga mapahangop sa tanan nga ang pagbasa ang indi makabig nga ‘boring’ sa baylo madamu sang ihibalo nga makuha paagi sa pagbasa.
