ILOILO CITY – Ginlaslasan ni Magdalo Rep. Gary Alejano si Presidente Rodrigo Duterte sa pagbasol sa administrasyon ni anay Presidente Benigno “Noynoy” Aquino III kag sa Amerika sa militarisasyon nga ginahimo sang China sa West Philippine Sea.
Ginpahayag sang mamalidha sa Bombo Radyo nga naga-ulianon na ang presidente.
Nahimo na sang Aquino administration suno kay Alejano ang ila papel sini paagi sa pagpasaka sang reklamo sa Permanent Court of Arbitration.
Apang wala ini gin-implementar ni Duterte suno sa mamalidha apisar nga pabor sa Pilipinas ang desisyon.
Nahibaluan nga nagguwa ang ruling sang Permanent Court of Arbitration sang July 2016 kun sa diin nakapanaog na sa puwesto si anay Presidente Aquino.
Indi man mahimo buligan sang iban nga pungsod ang Pilipinas suno kay Alejano, sa claims sini sa West Philippine Sea.
Ginpahayag sang mamalidha nga indi kaangay sang mga pungsod Vietnam kag Indonesia, ang Pilipinas nagahipos lang sa mga ginahimo sang China sa South China Sea, gani indi paglauman suno sa mamalidha nga magbulig ang Estados Unidos.