ILOILO CITY – Tatlo ka wave ang nag-apekto komunidad ilabi na sa edukasyon bangud sa COVID-19 pandemic.
Sa interview sang Bombo Radyo kay Dr. Rejie Palmos, Coordinator sang Center for Peace Education sa West Visayas State University, iya ginpahayag nga lakip sa mga wave amo ang kahadlok nga malatnan sang balatian, epekto sa ekonomiya kag mental health.
Suno kay Palmos, nagakadapat nga likawan ang pagbasulay kun sin-o ang may sala kag sa baylo dapat nga magbuligay.
Tion naman ini suno sa natungdan nga mahatagan sang kahigayunan ang mga ginikanan nga magbalik sa kinaandan bilang “first teacher’ sang mga estudyante.
“Communication is very essential at this point in time. Ang communication sang bata sa ginikanan. Ang ginikanan sa bata. Ang ginikanan sa manunudlo. Ang mga manunudlo sa ginikanan,” pahayag ni Palmos.
Ginpahayag sang natungdan nga kun nabudlayan man ang mga estudyante kag ginikanan sa mga asignatura, mahimo ang mga ini makig-angot sa mga manunudlo agud matudluan ang mga ini kag magiyahan.
Sa bahin ni Palmos, masami nga open ang iya online accounts agud mabuligan ang mga estudyante.
