ILOILO CITY – Ginaduso sang Philippine Drug Enforcement Agency (PDEA) sa mga transport terminal nga magpatuman sang istrikto nga pagsulundan sa pagbaton sang mga ginapadala nga bagahe.
Ini matapos nga nakuhaan sang lima ka bulto sang shabu nga nakasulod sa paper bag ang isa ka unit sang Vallacar Transit nga amo ang operator sang Ceres bus, sang damlag lang.
Sa interview sang Bombo Radyo kay PDEA-6 director Wardly Getalia, iya ginpahayag nga ti-on na agud istriktuhan sang management sang mga transport terminal kag mga service courier provider ang pagbaton sang mga ginapadala nga bagahe.
Mas makapaayo suno kay Getalia nga pangitaan sang valid identificatiion cards ang sender kag amo man ang receiver sang bagahe.
Bangud nga kulang ang canine units sang PDEA, mahimo nga magpahamtang sang scanner sa mga terminal agud matumod kun may kontrabando sa sulod sang bagahe.