ILOILO – Padayon ang pagbaton sang Returning Overseas Filipinos sa probinsya sang Iloilo samtang temporaryo anay nga ginpauntat ang pagbaton sang Locally Stranded Individuals.
Sa interview sang Bombo Radyo kay Provincial Administrator Atty. Suzette Mamon, iya ginpahayag nga wala nalakip ang Iloilo sa moratorium sa pagbaton sang Returning Overseas Filipinos nga mandu sang National Inter-Agency Task Force samtang may yara naman sang travel restriction sa Metro Manila rason nga wala anay sang may nagapauli nga mga Locally Stranded Individuals.
Suno kay Mamon, lain ang proseso sa pagpauli sang Returning Overseas Filipinos kun ipaanggid sa Locally Stranded Individuals apang santo sa data sang Provincial Government subong lamang nga bulan sang Agosto, naglab-ot sa 8,000 ang Returning Overseas Filipinos samtang masobra sa 6,000 naman ang Locally Stranded Individuals kun sa diin 9 ang total death cases.
Naglab-ot na sa 258 ka Locally Stranded Individuals ang nagpositibo sa COVID-19 samtang 121 naman sa Returning Overseas Filipinos kag sa subong, nagapabilin nga “manageable” ang mga quarantine facilities sa probinsya magluwas sa pila ka mga banwa.
