ILOILO CITY–Maguba ang peace process  sa ti-on nga magmadinalag-on ang Duterte administration sa pagbawi sang amnestiya nga ginhatag sadto kay Senator Antonio Trillanes IV.
Sa interview sang Bombo Radyo kay anay Solicitor General, Florin Hilbay, iya ginpahayag nga dako nga kwestyon sa pagkatampad sang gobyerno sa ila nga amnesty program ang natabo kay Trillanes.
Sunu kay Hilbay nga maguba ang programa sang gobyerno nga nagahatag sang amnestiya sa mga nakasala sa gobyerno sang Pilipinas kaangay sang mga rebelde.
Madulaan sang pagsalig ang mga rebelde sa gobyerno sunu kay Hilbay bangud nga posible nga matabo man sa ila ang natabo kay Trillanes nga ginbawi-an sang amnestiya.
Makahatag man ini sang kahangawa  sa tanan  nga mga nahatagan na sang amnestiya sang nagliligad nga adminsitrasyon  bangud nga wala na sang kasiguraduhan ang kahilwayan  nga ginhatag sa ila.
Tungud diri sunu kay Hilbay nga kinahanglan nga tun-an sang mga huwes kag mga mahistrado ang kung nagakapat bala nga hatagan sang gahum si Presidente Rodrigo Duterte nga bawi-on ang amnestiya nga ginhatag kay Trillanes.