Indi malikawan nga mamalisyahan nga may yara sang lamud politika ang pagbag-o sang hepe sa Buenavista Municipal Police Station sa probinsya sang Guimaras.
Ini ang ginapatihan ni Buenavista, Guimaras Mayor Eugenio Reyes matapos nga ginbuslan ang anay hepe nga si Pol. Maj. Anton Von Winkle Lamson.
Nahibaluan nga si Lamson ang girelieve bilang hepe sang Buenavista MPS agud magpungko bilang bag-o nga Platoon Leader sang Guimaras Provincial Mobile Force Platoon.
Sa interview sang Bombo Radyo kay Reyes, iya ginpahayag nga nakibot ini sang ginpadala nga bag-o nga hepe si Pol. Maj. Kenneth Bermejo bangud wala ini nalakip sa nauna na ginpasa nga rekomendasyon sang Guimaras Police Provincial Office (GPPO).
Ginkwestyon man sang natungdan ang purpose ni Acting GPPO director Pol. Col. Richard Baluis sa pagpadala sang mga rekomendasyon kun indi man sini pagkwaon ang napili-an sang isa ka local chief executive.
Nagapati man ang alkalde nga maapektuhan ang eleksyon bangud sa posibilidad sang pagpamolitika sa amo nga lihok sang Guimaras Police Provincial Office (GPPO).
