Gintuad sang Iloilo Provincial Drug Enforcement Unit (PDEU) nga ang bag-o nga istratehiya sang mga durugista amo ang pagbilin sang iligal nga druga sa publiko.
Sa interview sang Bombo Radyo kay Police Major Dadje Delima, Head sang Iloilo Provincial Drug Enforcement Unit, iya ginpahayag nga mas mahapos ini nga transaksyon sa ila bangud nga ilatag ukon ibilin lang sa isa ka lugar kag picture-ran ang iligal nga druga kag mahimo na sila gilayon nga makalakat.
Suno kay Delima, maayo lang kon may mga ‘honest’ nga mga residente ang makapulot kag mag-surrender sa kapulisan apang kon wala, isa na naman nga pagpanghangkat sa bahin sang talatapan.
Ginbuyagyag man sini nga madugay na man nga gina-monitor sang talatapan ang amo nga modus.
Sa subong, santo sa obserbasyon sang otoridad, medyo nagahagan-hagan na ang mga durugista sa amo nga buluhaton bangud man sa sunod-sunod nga operasyon sang kapulisan.
