ILOILO CITY – Nagalaum ang Simbahang Katolika nga mangin kabahin na lang sang maragtas sang pungsod ang krisis sa Coronavirus Disease 2019 (COVID-19).
Sa 6:30 sa aga nga misa sa Jaro Metropolitan Cathedral nga nabati-an sa Bombo Radyo Iloilo, nangin sentro sang homily ni Msgr. Meliton Oso, director sang Jaro Archdiocesan Social Action Center, ang tuhoy sa importansya sang pagbinuligay agud nga malampuwasan ang pagtilaw.
Suno kay Msgr. Oso, kinahanglan nga magbinuligay ang tanan ilabi na subong nga may yara sang pandemic kag dapat nga sundon ang panugyan sang gobyerno agud nga indi na makadugang sa numero sang mga nagpositibo sa virus.
Ginpahayag ni Msgr. Oso nga bilang tawo, normal lamang nga makabatyag sang kahangawa apang indi ini rason agud nga magpabaya sa katungdanan ilabi na sa pagbulig sa mga nagakinahanglan.
Paagi sa pagpabilin sa balay kag pagsunod sa proper hygiene suno sa natungdan, maprotektahan ang kaugalingon kag makabulig pa sa mga frontliners.
Kadungan sini, nagahingyo man si Msgr. Oso nga likawan ang diskriminasyon sa mga medical personnel nga amo ang nagapangabudlay sa pag-atipan sang mga pasyente.
Sa subong, may yara na sang mandu nga gamiton ang parish funds agud nga makabulig ang Simbahang Katolika sa mga nagakinahanglan.
