Liwat nga nakabisita si Former Iloilo City Mayor Jed Patrick Mabilog subong nga Fiesta Minatay sa iya mga ginikanan nga nagtaliwan matapos ang pito ka tuig.
Sa interview sang Bombo Radyo kay Mabilog, iya ginpahayag nga bisan pa-paano, nabulong ang iya kahidlaw indi lang sa iya ginikanan kundi pati man sa iya nga mga relatives nga nagtaliwan sang wala siya sa Pilipinas.
Suno kay Mabilog, ang pagbisita sa iya mga pinalangga ang isa man ka kahigayonan agud nga dumdomon ang iya kaayohan nga ginhimo samtang sila ang nagakabuhi pa.
Ginakabig man sang anay alkalde nga isa ka early ‘Christmas gift’ ang makapadulong sa iya ginikanan sa tion sang tigkalalag.
Para sa iya, adlaw-adlaw nga regalo ang makabalik sa Iloilo City kag ma-eksperyensya ang pagpangabuhi nga matawhay.
Tion man ini suno sang natungdan nga mabantayan ang pang-gobyerno sang syudad kag makabulig sa mga pumuluyo.
