ILOILO CITY – Ginabantayan na ang pag-abot subong nga adlaw ni Presidente Rodrigo Duterte sa haya sang Ilongga OFW nga si Joanna Daniela Demafelis sa Barangay Ferraris, Sara, Iloilo nga ginpatay sang iya amo sa Kuwait kag ginsulod sa freezer.
Karon sa hapon ginalauman ang pag-abot sang presidente sa puluy-an sang pamilya Demafelis.
Makaupod sang presidente sanday Department of Labor and Employment (DOLE) Secretary Silvestre Bello III kag Overseas Workers Welfare Administration (OWWA) Administrator Hans Leo Cacdac.
Ginalauman naman ang pagpalab-ot sang bulig sang presidente sa pamilya sang ginpatay nga OFW.
Una na ginpahayag sa Bombo Radyo Iloilo sang iloy ni Joanna nga si Eva Demafelis nga una sini pangayuon nga mahatagan sang hustisya ang kamatayon sang iya bata nga sanday Nader Essam Assaf, isa ka Lebanese, kag asawa sini nga si Mona Hassoun, isa ka Syrian.
Gikan sa haya ni Joanna, magapadulong ang presidente sa Camp General Adriano Hernandez sa Dingle, Iloilo agud pangunahan ang paglunsyar sang TienDA program sang Department of Agriculture kag magaatubang sa hanay sang militar.
Samtang ginkalipay naman sang pamilya Demafelis ang pagpasiguro sang gobyerno nga sabton ang pagpatindog sang balay nga ginsuguran ni Joanna mangin ang pagpasiguro ni Sen. Manny Pacquiao nga gawaron sini ang tatlo ka ektarya nga duta sang mga Demafiles nga nakaprenda.
Sa interview sang Bombo Radyo, ginpahayag sang utod ni Joanna nga si Joey Demafiles nga dako ini nga bulig sa ila.
Naintyindihan man sini ang pagka-emosyunal ni Pacquiao ilabi na nga nagikan man ini sa pigado nga pangabuhi sadto rason nga nabatyagan sini ang kabudlay nga naagyan ni Joanna.