Apisar sang panawagan kag apelar halin sa international community, gindayon gid sang Singapore ang pagbitay sa isa ka mentally disabled nga lalaki nga may kaso sa iligal nga droga.
Ini amo ang Malaysian nga si Nagaenthran Dharmalingam, 34, nga naaresto sang 2009 bangud nadakpan sa tuyo sini nga pagpasulod sang tatlo ka kutsara ukon 43 grams sang heroin sa Singapore.
Tuman ka kontrobersyal ang kaso ni Dharmalingam bangud may yara ini sang IQ nga 69 — ang level nga ginakilala nga intellectual disability.
Kun gobyerno naman ang pahambalon, nahangpan ni Dharmalingam ang nature sang iya nga ginhimo kag wala man sini nadula ang iya nga sense of judgment kun ano ang sala kag ang husto.
Suno pa sa korte, nag-agi man ini sa “due process in accordance with the law” bangud 11 ka tuig nga nangin sulit-sulit ang iya nga appeal.
Suno naman sa utod ni Dharmalingam, temprano pa nga ginpatigayon ang pagbitay kahapon. Ginpadala ang iya nga lawas sa Malaysia kag igahaya sa Ipoh sa amo nga pungsod.
Suno kay Bombo International Correspondent Mercy Saavedra Cacan direkta sa Singapore, may last appeal pa ang pamilya sa korte kahapon apang wala na ginpamatian bangud isa ang Singapore sa may pinaka-istrikto nga layi pag-abot sa drug trafficking.
Nobyembre pa sang nagligad nga tuig naka-schedule ang pagbitay kay Dharmalingam, kag madamo ang nagpakamalaot sa sini nga akto bangud sa ginapahayag mental disability sang lalaki.
Matapos ang pila ka tuig nga pagpakibato sa amo nga kaso, napierde si Dharmalingam sa kaso bangud ginbasura sang huwes ang argumento nga ang pagpatay sa isa ka tawo nga may problema sa paminsaron ang naga-contravene sa international law. ##
