𝗜𝗟𝗢𝗜𝗟𝗢 𝗖𝗜𝗧𝗬 — Ginhatagan sang igtalupangod sang isa ka abogado ang importansya sang ‘privacy’ sa paggamit sang cellphone ilabi na sa tunga sang mag-asawa ukon magkahagugma.
Sa interview sang Bombo Radyo kay Atty. Dominggo Oso, Jr., Bombo Abogado, iya ginpahayag nga wala sang kinamatarong ang isa ka tawo– bisan ang asawa– nga lantawon ukon buksan ang cellphone sang isa ka tawo bangud ini ang isa ka ‘privacy issue’.
Suno kay Oso, daw kaangay man ini sa ginpadala nga sulat paagi sa koreyo ukon postal service nga hugot nga ginadumulian nga buksan kag basahon.
Ginpahayag man sini nga mahimo lamang nga mabasa kag mabuksan ang isa ka sulat kon madesisyonan sang korte.
Gin-athag man sang natungdan nga indi pagbatunon sang korte bilang ebidensya sa kaso sang pagpanglu-ib ang mga impormasyon nga nakuha sang isa ka tawo paagi sa iligal nga pamaagi, kaangay na lamang sang pagbukas sang cellphone.
Nagpahanumdom man ini sa publiko ang paghatag sang privacy sa asawa ukon kahagugma bangud ini ang ila nga kinamatarong.
