Posible nga mas ma delay pa ang pagbukas sang ekonomiya sa Ireland bangud sa panibag-o na naman nga variant sang coronavirus nga amo ang Delta variant.
Suno kay Bombo International Correspondent Abraham Denosta direkta sa Ireland, sang nagtimbuok ang kaso sang COVID-19 sa nasambit nga pungsod, wala gid sang bisita ang mahimo nga makasulod sa ginatrabahuan niya nga ospital.
Apang sang naghagan-hagan na ang virus, ginpahanugutan na ang isa ka bisita sa kada pasyente sang tinalikdan lang nga semana sa diin dapat nga sundon ang minimum health protocols.
Pahayag ni Denosta, humalin sadto, wala ginapahanugutan ang dine in services sa mga restaurants.
Una man nga nakabaton sang bakuna ang mga healthcare workers sa Ireland sa diin Pfizer ang gintublok sa ila.
Base sa data, 1.5 million ka mga indibidwal na ang nakabaton sang first dose sang bakuna kag yara pa lang sa 500 ang makabig nga fully vaccinated.
Dugang pa sang natungdan, ang Pilipinas ang ginakabig nga red country sa diin hugot nga ginasunod ang mandatory 14 day hotel quarantine kag mismo ang traveler pa ang magabayad sa hotel kag iban niya nga kinahanglanon.
