ILOILO CITY – Aprubado na sang Inter-Agency Tak Force on Emerging Infectious Disease ang bag-o nga school calendar nga magabukas sa Agosto bangud sa Coronavirus pandemic.
Sa interview sang Bombo Radyo kay Dr. Lea Belleza, Information Officer sang Department of Education 6, iya ginpahayag nga base sa nakasugtan sang Inter-Agency Task Force kag Department of Education, magasugod ang klase sa Agosto 24, 2020 kag magatakop sa Abril 31, 2021.
Suno kay Belleza, Hunyo 1 naman ang pagbalik sa trabaho sang mga manunudlo bangud kinahanglan pa nila ihanda kag hitsuon ang mga kinahanglanon para sa bag-o nga pamaagi sa pagtudlo subong nga tuig.
Ginpahayag ni Belleza nga magluwas sa mga manunudlo, kinahanglan man nga ihanda ang ginikanan sang mga estudyante para sa pag-implemetar sang bag-o nga module nga maga sentro sa online classes.
Bangud ginasunod ang physical distancing, limitahan ang numero sang mga estudyante nga magasulod sa isa ka classroom kag buhinan ang adlaw sang ila pag-eskwela.
Lakip man diri ang pagbuhin sang load sa mga lesson nga ginatudlo kun sa diin nagakadapat nga ‘essential lessons’ lang ang mangin prayoridad.
Magapadayon naman ang Brigada Eskwela subong nga tuig apang pagalimitahan lang ang numero sang magatambong.
