ILOILO CITY – Naatrasar ang pagbukas sang klase sa mga buluthuan sa Texas kasunod sang paglaslas sang Hurricane Harvey.
Ginpahayag ni Bombo international correspondent Chester Janay, isa ka Ilonggo nga sa karon nagatrabaho bilang machine operator sa Texas, apisar wala na naga-ulan, madamo gihapon nga parte sang estado ang madalom pa ang tubig.
Indi naman makabalik sa ila puluy-an ang mga apektado nga residente nga sa karon nagaserbe nga evacuation center, rason nga liwat ginpa-iway ang pagbukas sang klase.
May pila man ka Pinoy suno kay Janay nga nagub-an sang balay apang nagpangibabaw ang bayanihan spirit sang mga Pinoy.
Dako nga problema sa karon ang supply sang gasolina bangud indi makakuha sang supply sa mga port bangud nga madalom ang baha.
Dako nga bahin pa sang Texas ang wala sang supply sang koryente.
Nag-deploy man sang dugang nga puwersa ang Texas police agud magbantay sang mga pamalay bangud sang looting ukon pagpangawat.