THAILAND – Nag-angkon sang nanari-sari nga reaksyon ang pagbukas sang mall kag shopping center sa Thailand matapos ang pila ka bulan nga lockdown.
Suno kay Bombo International Correspondent Cleo Rose Jondonero, nagdinaguso ang customer sa una nga adlaw sang pagbukas sang mga mall ilabi na sa Bangkok.
Ginpahayag ni Jondonero nga bangud sa istrikto nga pagsulundan, amat-amat nga naggamay ang mga tawo nga nagasulod sa mall bangud nga kinahanglan pa nila nga magpila sa entrance.
Natalana naman sa Hulyo 1 ang pagbukas sang klase sa Thailand kag sa subong, ang online classes lamang ang ginapahanugutan.
Naglab-ot na sa 3,028 ang COVID-19 cases, 2,856 naman ang naka recover kag 56 ang patay.
Gin-aprobahan na sang State Enterprise Policy Office ang pag-file sang bankruptcy sang Thai Airways International sa Thailand.
Ginkumpirma mismo ni Government spokesperson Narumon Pinyosinwat nga ginkasugtan sa pagsinapol sang
State Enterprise Policy Office nga maga-file sang bankruptcy ang Thai Airways International sa Central Bankruptcy Court.
Subong kun tani nga Mayo ang deadline sang pagbayad sang Thai Airways International sang loan apang bangud sa Coronavirus pandemic, padayon nga nagapamiyerdihan ang nasambit nga airline company.
Ginabanta nga nagalab-ot sa masobra sa 300 billion baht P4.8 trillon ang utang sang nasambit nga airline company kag sang Abril, gin-anunsyo nga nagnubo sa 10-12 billion baht ukon P15-P19 trillion ang pondo sang kompaniya kag para lamang ini sa isa ka bulan nga sweldo sang tanan nga empleyado.
Humalin sang 2017 tubtub 2019, nagdeklarar sang net loss ang flagship carrier.
Padayon naman nga ginapangita sang otoridad ang duha ka wala makilala pa nga suspek nga nagpangawat sa isa ka bangko sa Chiang Rai province.
Santo sa report, nakasuksok sang itom nga panapton kag naka helmet ang mga suspek kun sa diin natigayon nga makuha ang 1.05 million baht ukon P1.7 billion.
Santo sa pahayag sang bank manager, napilitan siya nga ihatag sa mga suspek ang nasambit nga kantidad bangud sa tuman nga kahadlok.
Nahibalu-an nga kalabanan sa mga magagmay nga bangko sa Thailand ang wala sang security guard.
