Ginalantaw sang isa ka economic expert nga isa patimaan sang mas madalom nga problema sa sistema, indi lamang sa trapiko kundi pati sa pagdumala sa imprastraktura, ang natabo nga pagbunggo sang wing van sa vertical clearance structure sa Buhang flyover.
Sa interview sang Bombo Radyo kay Mr. Bonnie Ladrido, Executive Director sang Institute of Contemporary Economics, iya ginpahayag nga ang insidente ang indi dapat kabigon nga simple nga sala sang drayber.
Sa baylo, ini suno sa iya ang “symptom of systemic failure” nga may direkta nga epekto sa ekonomiya sang syudad.
Ginpaathag niya nga ang Buhang Flyover, bilang kabahin sang C-1 corridor, ang gindisenyo agud mapadasig ang hulag sang urban traffic kag mabuhinan ang congestion sa sentro sang syudad.
Apang, ang aktuwal nga paggamit sini ang malayo sa orihinal nga katuyuan.
Gintumod niya nga ang padayon nga paglabay sang dalagko nga freight vehicles sa ruta ang nagadulot sang sulit-sulit nga aberya, dugang sa gasto sa logistics, kag delay sa dalagan sang ekonomiya.
Ginhatagan niya pagtamod nga ang pagbutang sang clearance restrictions ang isa ka “reactive measure” lamang.
Pahayag niya, apisar insakto ini para protektahan ang flyover, wala naman sini ginatalupangod ang ugat ng problema nga amo ang kakulangan sa integrasyon sang kabilugan nga transport system.
Para sa eksperto, ang ini nga “minor incidents” ang mayor nga indicators sang structural inefficiency.
Sa iya paglantaw, ang matuod nga isyu ang ang yara sa implementasyon kun sa diin bisan maayo ang plano kag disenyo, apang wala ini napatuman sang insakto, ang resulta amo ang isa ka sistema nga palpak.
Dugang niya, ang insidente sa Buhang Flyover ang dapat magserbe nga paandam sa mga nagaplano kag nagapatuman sang proyekto nga dapat sundon gid kag kompletuhon.
