Nabukaran ang isyu sang road safety kadungan sang aksidente nga natabo kaina sang aga sa Barangay Banuyao, Lapaz, Iloilo City matapos nga nakabulasot ang duha ka motorista sa isa ka manhole nga wala sang early warning device.
Sa interview sang Bombo Radyo kay Jason Piamonte, isa ka retired police officer kag certifed safety officer, iya ginpahayag nga highly-illegal kag improper ang ginhimo sang contractor nga butangan lang sang yellow caution tape kag straw rope ang palibot sang manhole.
Yari ang mga rekomendasyon sang safety officer agud malikawan ang kaangay nga disgrasya:
Kun under construction ang isa ka dalan, dapat nga may warning device na nga nakabutang antes pa man makaabot ang motorista sa area kun sa diin mismo gina-construct ang dalan.
Indi man bastante nga reflectorized stickers lang ang ibutang suno kay Piamonte bangud piraw man ang suga sang iban nga salakyan ilabi na kun nagaulan. Dapat nga may appropriate nga suga ukon blinker suno sa natungdan.
Dapat nga yara sa husto nga lugar ang stockpiling sang materials kag dapat nga wala na sa project site ang waste kag excess materials kaangay sang broken pavements kag excavated debris.
Responsibilidan man sang local government unit (LGU) suno kay Piamonte nga mag-assign sang safety officer nga amo ang magalibot sa lugar agud mag-identify sang hazard. Lain ang trabaho sang engineer, lain ang trabaho sang safety officer, suno kay Piamonte.
Sa idalom sang pagsulundan sang Department of Public Works and Highways (DPWH), dapat man nga siguraduhon sang DPWH implementing offices nga may maga-monitor sa compliance sang road works safety requirements.
