ILOILO – Nakadepende sa seating capacity ukon seating arrangement ang pagpatuman sang physical distancing sa pagsakay sa mga pampubliko nga salakyan.
Ini ang panindugan ni Iloilo Gov. Arthur Defensor Jr. may kaangtanan sa proposal sang Department of Transportation nga reduce physical distance kun sa diin halin sa 1 meter, mangin 0.75 meter na lang ang distansya sang tagsa ka pasahero.
Sa interview sang Bombo Radyo kay Defensor, iya ginpahayag nga indi applicable ang 1 meter ukon 0.75 meter nga physical distance sa mga de-pampasahero nga jeep, bus ukon van bangud nga kun sundon gid ang nasambit nga measurement, pila lamang ka pasahero ang mahimo nga makasakay sa tagsa ka trip.
Suno kay Defensor, ang distansya sa pagbutang sang barrier ang nakadepende sa kadakuon sang tagsa ka de-pampasahero nga salakyan kag ang reduce physical distance nga ginaduso sang Department of Transportation suno sa Gobernador ang mangin applicable lamang sa Metro Rail Transit (MRT) kag Light Rail Transport (LRT).
Ang measurement sa physical distancing measure suno kay Defensor ang mahimo lamang nga mapatuman sa pagsulod sa mga commercial establishment ukon sa pagpadulong sa mga pampubliko nga lugar.
Apisar sini, ginpahayag sang natungdan nga wala pa man gin-aprobahan sang Inter-Agency Task Force ang nasambit nga proposal.
