ILOILO – Wala sang epekto sa relasyon sang Philippine Drug Enforcement Agency 6 kag Police Regional Office 6 ang ginbuyagyag sang damlag lang ni Philippine Drug Enforcement Agency director general Aaron Aquino nga may mga pulis nga naga recycle sang mga iligal nga droga nga makuha sa buy bust operation.
Nagguwa man sa publiko si anay PNP Criminal Investigation and Detection Group chief Benjamin Magalong kag ginatudlo si Philippine National Police Chief Gen. Oscar Albayalde nga ginapahayag naga protekta sa 13 ka mga pulis nga nakasuhan bangud sa isa ka drug operation sa Pampanga sang 2013.
Sa interview sang Bombo Radyo kay Philippine Drug Enforcement Agency 6 Officer-In-Charge Alex Tablate, iya ginpahayag nga madamo sang ginahimo nga joint operations ang PNP kag PDEA ilabi na sa Western Visayas.
Suno kay Tablate, ang mga nagakatabo nga imbestigasyon subong sa Senado ang may tinutuyo lamang nga mahibaluan ang kamatuoran.
Dugang pa sang natungdan, wala siya sang ihibalo kun sin-o bala ang nagahambal sang matuod sa tunga nanday Aquino, Magalong kag Albayalde bangud kaangay sang mga pumuluyo, luyag man niya mahibaluan kun ano ang matuod.
