DUMANGAS, ILOILO – Prebelihiyo lamang kag indi legal ang pagbyahe sang Electric Bike drivers sa Dumangas, Iloilo.
Ini ang pahanumdom ni SB Member George Acepcion, chairman sang Committee on Transportation, kadungan sang ginpatigayon nga pagsinapol kaupod ang asosasyon sang E-Bike kag Trisikad drivers sa nasambit nga banwa.
Sa iya nangin mensahe, ginpahayag ni Acepcion nga ang Trisikad Operators lamang ang may permit samtang ang pagbyahe sang E-Bike naman ang makabig nga illegal santo sa pagsulundan sang Land Transportation Office.
Suno kay Acepcion, humalin sang 1988, ginpahanugutan nga makabyahe ang trisikad bilang bulig na lang sa mga driver.
Kun tani suno kay Acepcion, indi pag-abusaran ang ginahatag nga pabor sang Local Government Unit agud nga ang tanan ang maka-angkon man sang palangabuhian.
Nahibalu-an nga ang nasambit nga pagsinapol ang nag-ugat sa reklamo sang Trisikad drivers nga nagapamigado ang ila kita bangud nga nagakompetensya ang E-Bike drivers.
