ILOILO CITY- Ipatawag sang senado si anay spokesperson Harry Roque agud magpaathag nahanungod sa ginaalegar kaangtanan sini sa Lucky South 99, ang illegal Philippine offshore gaming operator (POGO) nga gin-raid sa Porac, Pampanga Sang nagligad nga bulan.
Ini matapos nadiskubrehan nga si Harry Roque ang legal head sang Lucky South 99 base sa organizational chart nga nakuha sang Senate Committee on Women and Children, nga nagapanguna sa POGO probe.
Suno kay Sen. Risa Hontiveros, chairperson sang panel, magluwas kay Atty. Harry Roque, imbitado man si anay chairperson Andrea Domingo sa masunod nga hearing.
Sa hearing subong nga adlaw, ginkumpirma ni Philippine Amusement and Gaming Corporation (Pagcor) Chairman Alejandro Tengco sa Senate panel nga si former presidential spokesperson Harry Roque amo nga “legal head” sang gin-raid sang damlag lang nga Philippine offshore gaming operator (POGO) Lucky South 99.
Ginsugid man ni Tengco sa ginpatigayon nga ikaapat nga hearing sang Senate committee on women, children, family relations, and gender equality nga si Roque ang may yara sang kolaborasyon sa POGO.
Suno pa kay Tengco, gindala man ni Roque ang authorized representative sang Lucky South 99 nga si Katherine Cassandra Ong,sa iya opisina para sa meeting sang Hulyo 2023.
Yar man sa amo nga meeting si Pagcor Assistant Vice President for Offshore Gaming License Department Jessa Mariz nga isa sa mga indibidwal nga ginpadal-an sang subpoena sang Senate panel agud magtambong sang hearings.
Suno kay Tengco, may yara sang problema sadto si Ong may kaangtanan sa utang sang Lucky South 99 sa Pagcor nga nagdangat sa $500,000 matapos nga ang iya gintugyanan sang bayad para sa Pagcor nga si Dennis Cunanan ang wala nag-remit sang kwarta.
Ginhingyo sini nga tugutan siya nga magbayad sa installment.
Matapos nag-apply ang Lucky South 99 para sa bag-o nga lisensya sa idalom sang bag-o nga guidelines sang Pagcor sang September 2023, gin-follow-up ni Roque sa opisina ni Fernandez agud ma-check ang application para sa lisensya nga sang ulihi, ginbasura man.
Gin-athag naman sang Pagcor officials nga wala sila gin-pressure ni Roque kag nagbulig lang sa Lucky South 99.
Una na ginpahayag ni Roque nga wala ini sang direkta nga koneksyon sa Lucky South 99.
Matandaan nga sang Hunyo 29, gintuad ni Tengco nga isa ka “former high-ranking government official” ang nagtuyo nga mag-facilitate sang paghatag sang gaming licenses sa mga POGOs nga gin-raid kag nakit-an nga involved sa illegal nga mga aktibidad.
