ILOILO CITY – Antes pa man ma-distribute ang droga sa mga street level individuals (SLI), ginadakop na sang kapulisan ang mga durugista nga makabig nga high value individuals (HVI).
Sa interview sang Bombo Radyo kay Police Lieutenant Colonel Antonio Benitez, Jr., pinuno sang Regional Police Drug Enforcement Unit (RPDEU) sang Police Regional Office (PRO) VI, iya ginpahayag nga ang sunud-sunod nga operasyon sang kapulisan kun sa diin dalagko nga bulto sang iligal nga droga ang ma-recover ang pagsunod sa direktiba ni PRO VI director Police Brigadier General Flynn Dongbo nga pangdakpon ang mga HVI.
Dugang pa ni Benitez, sang una, ang mga street level ang masami nila nga ginpangdakop apang subong, gina-una na ang mga HVI antes pa man magpanggamot.
Nahibaluan nga sa pinakaulihi nga operasyon sang RPDEU VI sa Negros Occidental, nagdangat sa masobra sa P7 million ang balor sang droga ang na-recover sa duha ka pangayaw nga mga durugista.
Antes sina, nagdangat man sa masobra sa P1 million ang balor sang shabu nga na-recover sa duha ka mga durugista sa ginpatigayon nga drug buybust operation diri sa syudad sang Iloilo.
Samtang, padayon ang coordination sang kapulisan sa rehiyon sa New Bilibid Prison (NBP) kag sa Philippine Drug Enforcement Agency (PDEA) angut sa gina-tuad sang mga durugista nga may koneksyon sila sa NBP.
Ginapahayag sang mga arestado nga contact sila sa una na nga mga nagkaladakpan nga yara subong sa NBP kag may gina-direct nga mga personalidad sa gwa sang correction facility nga amo ang nagapadala ukon nagadala sang droga pasulod diri sa Western Visayas.
Ang droga ang ginabutang sa suludlan sang gatas kag ginakarga sa roll on-roll off bus padulong sa rehiyon.
Nagapati man ang mga otoridad nga may yara sang Divine intervention sa asud-asud kag madinalag-on nga mga drug buy bust operations.
