Ginsulit sang Department of Foreign Affairs (DFA) nga ang political demonstration nga naangot sa kampanya para suportahan si former president Rodrigo Duterte amo ang rason kun ngaa may mga Pinoy nga gindakop kag gin-detain sa Qatar.
Ini kasunod sang ginapalapta nga impormasyon sang iban nga pro-Duterte social media pages nga wala sila gindakop bangud sa protesta kundi bangud sa isyu sa visa nga wala nagatugot sa ila nga magtinir sang legal sa Qatar.
“They were arrested because they participated in a political demonstration…. We know they were just indicating their support for the former president. And they were, I think they were harmless. It was more like a picnic gathering. However, they had on T-shirts and placards and that is the reason why they were arrested,” suno kay DFA Undersecretary Eduardo De Vega. “Hindi sila inaresto dahil walang visa. Wala.”
Naka-detain pa gihapon tubtub subong ang 16 ka mga Pinoy kag nakaguwa naman ang tatlo ka teenagers.
Pahayag pa ni Vega, padayon ang pagtrabaho sang Philippine embassy agud makumbinse ang otoridad nga buy-an ang mga Pilipino kag naganegosyar man nga penalidad lang nga kuwarta sa baylo nga kaso criminal.
Nahibaluan nga istrikto ang polisa sang Qatar sa public gatherings sa Gulf state, kag pananglitan magdayon gid ang kaso, mahimo sila mapreso sang tubtub sa tatlo ka tuig.
Nagpasiguro naman ang Malacañang nga indi pagpabay-an ang mga Pilipino nga nadakpan sa Qatar. Suno kay Palace Press Officer Usec. Claire Castro, obligasyon sang gobyerno nga buligan ang mga Pinoy bisan anuman nga duag ang ila ginasuportahan.
