ILOILO – Kwestyonable para sa Commission on Human Rights ang pagdakop sa mga preso nga nahilway paagi sa Good Conduct Time Allowance.
Sa interview sang Bombo Radyo kay Atty. Jonnie Dabuco, Regional Director sang Commission on Human Rights 6, iya ginpahayag nga kun wala sang warrant of arrest, makabig nga illegal ang pagdakop sa isa ka preso kag paglapas man ini sa iya tawhanon nga kinamatarong.
Suno kay Dabuco, mahimo lang nga dakpon ang isa ka preso kun may yara sang warrant of arrest kag kun warrantless arrest ang kaso nga iya ginapangatubang.
Ginpahayag man ni Dabuco nga ang warrantless arrest ang applicable lang kun ang isa ka preso ang wala nahatagan sang release order ukon nag-eskapo sa presuhan.
Sa kaso sang mga preso nga nahilway paagi sa Good Conduct Time Allowance, sila ang nahatagan sang release order gani, wala sang rason nga sila ang dakpon nga wala sang warrant of arrest.
Sa subong suno sa natungdan, isa sa pinakamaayo nga tikang amo nga ideklarar sang Korte Suprema nga null and void ang ginhatag nga release order sa mga preso bangud sa sala nga pagsuma sang Good Conduct Time Allowance.
Mas makapaayo man kun may yara sang igapasaka nga petisyon sa korte may kaangatanan sa nasambit nga kontrobersiya.
