Ginalantaw sang Iloilo City Government nga ang relocation sa tuman ka damo nga informal settlers amo ang mangin mayor nga solusyon para nga matapna na ang paglinapta kag pagtambak sang basura sa mga kasubaan sa syudad.
Sa interview sang Bombo Radyo kay Engineer Neil Ravena, head sang General Services Office, iya ginpahayag nga ini nga informal settlers amo gihapon ang ginatudlo nga rason kun ngaa wala nagahubas ang basura apisar pa sang pagpanglimpyo sang mga personnel sang syudad.
Suno kay Ravena, indi madali-dali nga masulod sang garbage collectors ang lugar nga ginatiniran sang informal settlers, gani nagapahapos na lang ini nga mga residente kag ginahaboy ang ila basura sa tubig.
Dugang sini, pila ka beses naman nga naistorya ni Mayor Jerry Treñas ang concerned nga 18 ka barangays nga ginaagyan sang Jaro River agud maplastar ang problema kag paano ini tapnaon.
Pahayag pa ni Ravena, kinahanglan anay nga pangitaan sang relocation site ini nga mga pumuluyo antes i-develop ang lugar.
Nagapadayon suno sa natungdan ang listahanay sa mga pumuluyo malapit sa baba sang suba para masaylo sa relocation site nga ginapangita sang syudad.
