ILOILO CITY – Nagpangayo sang paghangop ang mga barangay officials sang Bo.Obrero, Lapuz, Iloilo City matapos nga ginkulang ang ila mga pagkaon kag iban pa nga kinahanglanon sa mga residente nga apektado sang oil spill matapos naglupok ang power barge sang AC Energy.
Sa exclusive interview sang Bombo Radyo kay Punong Barangay Ricardo Diño, iya ginpahayag nga ang duha ka mga eskwelahan sa ila lugar ang nagserbe nga evacuation centers sang mga apektado nga niya nga mga residente.
Suno kay Diño, mismo ang AC Energy ang nagahatag sang pagkaon para sa ila ginpahamtang nga community kitchen.
Apang suno sa punong barangay, gulpi lang nagdamo ang mga evacuees rason nga ginkulang ang mga pagkaon.
Diri kag naisipan nila nga butangan na lang sang tagsa ka community kitchen ang kada eskwelahan nga nagaserbe evacuation center kag isipon ang pinal nga numero sang mga evacuees.
Ginpasalig man sang natungdan nga indi na magutman ang ila mga residente kag mahatag ang pagkaon sa insakto nga oras.
