Ginakabig sang mga Pinoy nga nagsuporta kay President-elect Donald Trump nga kadalag-an sang kaayuhan kontra sa kalainan ang natabo nga resulta sang eleksyon sa Estados Unidos sang Amerika.
Suno kay Bombo International Correspondent John Tacapan direkta sa California, pro- God kag pro-people ang gin-elihir sang mga pumuluyo bangud sa mas positibo nga panindugan ni Trump sa pila ka isyu kun ipaanggid sa panindugan ni Harris.
Pahayag ni Tacapan vocal proponent sang reproductive rights kag abortion si Kamala samtang may mga reservations naman si Trump sa amo nga isyu.
Suno kay Tacapan, dismayado man ang mga pumuluyo sa malala nga economic inflation bangud sa Joe Biden-Harris policies may kaangtanan sa paggasto sang binilyon nga dolyares para suportahan ang giyera sang Ukraine batok sa Russia.
Pahayag ni Tacapan, kaangay nga naga-overspend ang US government sa butang nga wala man sang direkta nga maayo nga epekto sa mga pumuluyo.
Dugang niya, indi man kumbinsido ang mga tawo sa diversity ,equity, kag inclusion policy ni Harris bangud naga-promote ini sang employment sa mga incompetent nga mga mamumugon.
Isa man sa gintumod ni Tacapan nga negatibo nga butang sa kampanya ni Harris amo ang pag-endorso sa iya sang mga kilala nga celebrities nga apisar may yara sang ginaduso nga mga adbokasiya para sa women empowerment, nagapabulag-bulag naman sa isyu sang pag-exploit sa mga kababainhan.
