Nagbaha ang pagdayaw matapos ginlutos ni Filipino WBO bantamweight champion John Riel Casimero ang Cuban veteran two-time division champion nga si Guillermo Rigondeaux sa 12 round boxing match nga ginpatigayon sa Dignity Health Sports Park, Carson, California sa Estados Unidos.
Daog sa sambuwa via split decision ang Pinoy Pride nga tumandok sang Ormoc City, Leyte.
Ginpaboran sang mga judges ang pagka-agresibo kag impresibo nga performance ni Casimero.
115-113 ang score para kay Rigondeaux, samtang 116-112 kag 117-111 naman para kay Casimero.
Sa 12 rounds, mas madamo pa ang dalagan kag paglikaw sang 40-anyos nga Cuban boxer batok sa 32-anyos nga Pinoy Champion.
Bangud diri, nangin tuman ka obvious naman ang ‘frustrations’ ni Casimero lakip na sang mga tumalan-aw sa sulod sang arena.
Mabatian man ang ”booo” nga ginahaboy batok kay Rigondeaux.
Nahibaluan nga ang three division world champion nga si Casimero ang yara sa idalom sang MP Promotions ni Senador Manny Pacquiao.
Ini na ang ika-duha nga paglutos sang Pinoy Champion kay Rigondeaux nga naka-secure sadto sang duha ka gold medal sa Olympiada.
