ILOILO CITY – Nagbubu ang pagdayaw matapos ginkoronahan bilang Miss Universe Philippines 2020 si Rabiya Mateo sang Iloilo City sa coronation nga ginpatigayon sa Baguio City.
Si Rabiya ang tumandok sang Balasan Iloilo, 23, kag nagataas sang 5’7.
Ginlutos ni Rabiya ang 45 ka mga kandidata sa pageant day.
Nagtapos si Rabiya bilang cum laude sa kurso nga Bachelor of Science Major in Physical Therapy sa Iloilo Doctors College.
Si Rabiya ang ginkoronahan bilang Miss Iloilo 2020 nga amo ang nangin lyabe sa pagsulod niya sa Miss Universe Philippines.
Nahibaluan nga si Rabiya ang yara sa idalom sang beauty camp nga Aces and Queens nga iya sang Beauty-queen maker nga si Jonas Gaffud.
Lakip sa mga beauty queen nga yara sa Aces and Queens amo sanday Miss Universe 2015 Pia Wurtzbach, Miss World 2013 Megan Young, Miss Universe 2014 3rd runner-up Ariella Arida, Miss Universe 2012 1st runner-up Janine Tugonon, Miss World 1st runner-up Gwen Ruais, Miss Universe 2011 third runner-up Shamcey Supsup, kag Miss Universe 2010 4th runner-up Venus Raj.
Si Rabiya ang una nga ginlawag sa Top 16 sa diin ginpamangkot siya kun paano siya maghimo sang positibo kag malawig nga impact sa kalibutan bilang isa ka phenomenal woman.
Ang una nga pamangkot nga kun hatagan siya sang kahigayunan nga magbutang sang nawong sang isa ka tawo sa papel nga kwarta, sin-o ang iya pilion.
Samtang ang pinakaulihi nga pamangkot naman kay Rabiya nga kun ano ang papel sang pageants sa subong nga pandemya.
Sa ulihi, nabilin na lang sa stage sanday Rabiya kag Maria Ysabella Ysmael sang Parañaque tubtub nga gin-announce nga ang Miss Universe 2020 amo ang Ilongga beauty.
Lakip sa mga runners up amo sanday:
1st runner-up: Maria Ysabella Ysmael, Parañaque
2nd runner-up: Michele Gumabao, Quezon City
3rd runner-up: Pauline Amelinckx, Bohol
4th runner-up: Kimberly “Billie” Hakenson, Cavite
Sa twitter ni Rabiya, iya ginpasalig nga handa na siya nga magtiglawas sang Pilipinas sa Miss Universe 2020.
