Indi ‘big deal’ para kay Iloilo City Acting Mayor Jeffrey Ganzon ang pagdeklarar ni Raisa Treñas-Chu sang 100-day countdown sang Iloilo Dinagyang 2025.
Si Raisa ang wala sang anuman nga posisyon nga ginakaptan sa syudad matapos nag-resign bilang executive assistant, apang siya ang nagbukas sang 100-day countdown apisar nga yara man si Ganzon sa kahiwatan.
Sa interview sang Bombo Radyo kay Acting Mayor Ganzon, iya ginpahayag nga ang organizer mismo sang Iloilo Festivals Foundation Incorporated (IFFI) ang nagpahanugot kay Raisa agud nga magpanguna sa kahiwatan.
Suno kay Ganzon, tuman ka gamay nga deperensya ang natabo kag nagpanugyan ini sa mga tawo nga nagahatag malisya nga “Don’t be too righteous”.
Gin-athag man sini nga wala naglain ang iya buot kag wala sang rason agud nga magsunggod ini sa mga simple nga sirkumstansya.
Nagpanindugan man si Ganzon nga indi si Raisa ang balasulon sa amo nga hitabo.
Una na nga nagpahayag ang Iloilo Festivals Foundation Incorporated nga sila ang nag-imbitar kay Mayor Jerry Treñas agud nga opisyal buksan ang countdown.
Apang bangud nga naka-sick leave kag yara sa Manila ang alkalde, ginhingyo sini si Raisa nga magtilawas sa iya sa amo nga kahiwatan.
