ILOILO CITY – Tion na agud nga maghanda sang talamnan ang mga mangunguma bilang pagpanghanda para sa first cropping season kag wet cropping season subong nga gindeklarar na ang onset sang tig-ululan.
Ang lapta-lapta nga pagpanagu-ob, ang Super Typhoon Betty, kag ang habagat ang nagdala sang lapnagon nga pag-ulan sa western parts sang Luzon kag sang Visayas sang nagliligad nga mga inadlaw.
Ang lapnagon nga pag-ulan ang nagapatima-an na sa pagsugod sang tig-ululan sa pungsod ilabi na sa mga Climate Type I areasnga nagalakip sa Metro Manila, western parts sang Luzon kag sa Visayas.
Sa interview sang Bombo Radyo kay Mr. James Earl Ogatis, pinuno sang Regional Agri-Fishery Information Section sang Department of Agriculture- Region VI, iya ginpahayag nga dako ang mabulig sang tig-ululan sa mga mangunguma bangud nga kalabanan sa ila ang nagasalig lamang sa tubig-ulan.
Sa bahin sang ahensya, ginpahayag ni Ogatis nga napanagtag na sang Philippine Rice Research Institute ang mga binhi sa tagsa ka mga municipal agriculture offices.
Suno kay Ogatis, sa tion nga makasugod na sa pagtanum ang mga mangunguma, ginalauman nga maka-ani na sang produkto antes pa man ang opisyal nga pagsugod sang tig-ilinit sa ikatatlo nga quarter sang tuig kag ginapanan-aw nga magalawig pa tubtob sa 2024.
