Wala nadayon ang pagdeklarar sang state of calamity sa Syudad sang Iloilo may kaangtanan sa kakulang sang supply sang tubig.
Ini matapos nga kulang ang mga myembro sang Sangguniang Panlunsod matapos wala nakatambong sa session ang mga konsehal nga kaalyado ni Iloilo City Lone District Cong. Jerry Treñas.
Lakip lang sa mga nagtambong sa session amo sanday Konsehal Plaridel Nava, Liezl Joy Zulueta Salazar, Eduardo Peñaredondo, R. Leone Gerochi, Lyndon Acap, kag Joshua Alim.
Lakip sa mga wala nagtabong kag wala man sang official leave amo sanday Vice Mayor Jeffrey Ganzon, Councilors Love Baronda, Ely Estante, Armand Parcon , Jay Trenas, Liga ng mga Barangay President Irene Ong kag Sangguniang Kabataan (SK) Federation Presidente Leila Luntao.
Samtang, naka on leave naman si Konsehal Mandrei Malabor.
Nahibaluan nga pito kuntani ang kinahanglan nga mga konsehal agud makakuha sang quorum.
Sa interview sang Bombo Radyo kay Konsehal Plaridel Nava, majority floor leader sa Sangguniang Panlunsod, iya ginpahayag nga dismayado ini sa ginhimo sang majority block.
Suno kay Nava, mangin si Vice Mayor Ganzon ang wala nagpagwa sang memorandum nga maabsent ini kag ulihi lang nga nagpabalo nga si Konsehal Tupas ang magapungko bilang presiding officer.
Samtang, ginpahayag ni Nava nga matambong pa kuntani sa session si Ong apang sang makita sini nga absent ang iya mga kaalyado, naggwa ini kag nagpamalibad nga nagsakit ang iya tiyan.
Posible suno kay Nava nga wala nakatambong si Ong sa pagsinapol ang iya mga kaalyado nga indi ang mga ini magtambong sa session.
