ILOILO CITY – Ginatugyan ni Iloilo City Mayor Jerry Treñas sa Department of Health ang pagdesisyon kun bala tapuson ukon palawigon ang lockdown sa St. Paul’s Hospital of Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga indi siya makatugda natuhoy sa ginapatuman nga lockdown bangud nga ang Department of Health ang nagdeklarar sini sang Hunyo 28.
Suno kay Treñas, sa 17 ka panibag-o nga COVID-19 cases nga na record as of June 30, anum diri ang naghalin sa syudad sang Iloilo kun sa diin isa ang nurse gikan sa nasambit nga hospital.
Ginpahayag ni Treñas nga kalabanan sa mga nagapositibo amo ang Locally Stranded Individuals kag repatriated Overseas Filipino Workers.
May kaangtanan naman sa ginapatuman nga lockdown, ginpahayag ni Atty. Roy Villa, tagpamaba sang Regional Inter-Agency Task Force, nga posible buwas nga adlaw, Hulyo 1, tubtub Hulyo 2, ideklarar ang pagpauntat sang lockdown.
Sa pagpaathag ni Atty. Villa, pagahulaton ang resulta sang RT-PCR test sang 538 ka mga ginpangkuhaan sang swab sample antes makadesisyon ang task force.
Sa subong, nagalab-ot sa 48 ka doktor sa Internal Medicine samtang ginabanta nga 100 naman ka staff ang naga duty sa nasambit nga hospital.
