ILOILO CITY – Gintutukan ni Iloilo City Mayor Jerry Treñas kun paano dalayon nga madula ang illegal connection sa kuryente nga amo ang ginatunaan sang masami nga sunog sa syudad sang Iloilo.
Sa interview sang Bombo Radyo kay Treñas, iya ginpahayag nga luyag niya nga padayunon ang Low Load program agud nga mapahapos ang pag-apply sang konsumidor sang electric connections.
Magluwas diri, ginpahayag ni Treñas nga kinahanglan man nga istriktuhan sang mga Punong Barangay ang pagdumili sang illegal connection sa ila tagsa ka lugar.
Sa pagkamatuod suno kay Treñas, iya na nga napalab-ot sa MORE Electric and Power Corporation ang tuhoy sa iya plano.
Paagi sa nasambit nga programa, nagalaum ang alkalde nga dalayon na nga madula ang illegal connections sa syudad sang Iloilo.
