ILOILO CITY – May yara sang re-allignment sa mga personnel sang Iloilo City Police Office (ICPO) may kaangtanan sa tuyo ni Iloilo City Mayor Jerry Treñas nga pagdula sang Executive Order 146 ukon Liquor Ban sa syudad sang Iloilo.
Ini ang kasunod sang pagsinapol nanday ICPO Director Police Col. Martin Defensor Jr. kag ni Mayor Treñas.
Sa interview sang Bombo Radyo kay Defensor, iya ginpahayag nga indi na pagdugangan ang police personnel sa Mandurriao Police Station bangud nga indi lamang sa distrito sang Mandurriao may yara sang mga balay-ilimnan.
Bangud sini, re-allignment ang sabat sang ICPO suno kay Defensor ilabi na kun epektibo na ang pagdula sang Liquor ban.
Magluwas diri, mas makapaayo suno kay Defensor nga may yara sang functional Closed Circuit Television (CCTV) ang tagsa ka commercial establishment para sa monitoring.
Ginpahayag sang ICPO Director nga challenge accepted kun dalayon na nga dulaon ang EO 146 sa syudad sang Iloilo.
